Санал уламжлах тухай
Тус сумын Хүүлэй хан 5 дугаар багийн нутаг “Хүүлэй хан уул”, Сүүл буга 4 дүгээр багийн “Лүн уулын хяр, Адуун чулуун”, “Тасархай ухаа”гэдэг нэршилтэй газар нутагт ашигт малтмалын хайгуулын тусгай зөвшөөрлийг сонгон шалгаруулалтаар олгох боломжтой талбайг ялган санал авахаар ирүүлсэн Ашигт малтмал, газрын тосны газрын 2023-03-01 ны өдрийн 10/1057 тоот албан бичигт дурдагдсан газрын солбилцлийн цэгүүдийг газар дээр нь тулган шалгаж дүгнэлт гаргасан засаг дарга Б.Төрбатын дараах мэдээлэлийг хэлэлцээд ТЭМДЭГЛЭХ нь:
1.Ашигт малтмалын хайгуулын тусгай зөвшөөрлийг сонгон шалгаруулалтаар олгох боломжтой хэмээн санал ирүүлсэн 36, 37, 39 дугаартай 528.12 га бүхий бүс нутаг нь аймгийн иргэдийн Төлөөлөгчдийн хурлын 2015 оны 03 дугаар сарын 27-ны 03 тоот тогтоолоор тусгай хамгаалалтанд авсан Монгол улсын төвийн бүсийн үзэсгэлэнт таван “Хан уул”-ын нэг бөгөөд байгалийн унаган төрхөөрөө байгаа “Хүүлэй хан” уулын газар нутаг хамрагдаж байгаа тул энэ нь “Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хуулийн 4 дүгээр зүйлийн 4.1 дэх заалтад Монгол Улсын нутаг дэвсгэр дэх гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглоно гэж заасан нь Хүүлэй хан уулын ойн сан, Бугын гол, Бяцхан булаг, Тээлийн гол, Бэлхийн голын эхүүдтэй давхцаж байгаагаас гадна нэн ховордож буй буга, бор гөрөөс, мануул, шилүүс, нохой зээх, бодон гахай зэрэг ан амьтад нутагшдаг, ховор эмийн ургамлууд ургадаг бөгөөд Соёлийн өвийн бүртгэл мэдээллийн санд бүртгэгдсэн “Хүннү”-гийн үеийн булш хиргисүүр, овоо тахилга, рашаан булаг шанд зэрэг соёлын өвүүд байршдаг нь Соёлын өвийн тухай хуулийн 38 дугаар зүйлийн 38.1.1, 38.1.2 дахь заалтуудыг тус тус зөрчиж, иргэдийн эзэмшиж байгаа хөдөө аж ахуйн үйлдвэрлэлийн газар, өвөлжөө, намаржаатай давхацсан байна.
2.Сүүл буга 4 дүгээр багийн нутаг дэвсгэрт Ашигт малтмалын хайгуулын тусгай зөвшөөрлийг олгох боломжтой хэмээн санал ирүүлсэн 171, 172 дугаартай нийт 424,5 га бүхий 2 талбайн нь “Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хуулийн 4 дүгээр зүйлийн 4.1 дэх заалтад Монгол Улсын нутаг дэвсгэр дэх гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглоно гэсэн заалтыг зөрчсөн, 2015 оны Сумын иргэдийн төлөөлөгчдийн хурлын 09 тоот тогтоолоор “Орон нутгийн тусгай хамгаалалтанд” авсан “Бага Цайдам нуур”, “Муруй нуур” зэрэг нууруудын хамгаалалтын бүс болон “Цээлийн гол”-ын эх, “Өвөлжөө нуур”, “Адуун чулууны худаг”-тай тус тус давхцаж, түүх соёлын дурсгалт газар болох “Тахилга тайлга”-ын газар хамрагдаж байна.
Монгол Улсын Засаг захиргаа нутаг дэвсгэрийн нэгж түүний удирдлагын тухай хуулийн 35 дугаар зүйлийн 35.1.13, 35.1.17 дахь заалт, 48 дугаар зүйлийн 48.1 дахь, Ашигт малтмалын тухай хуулийн 17-р зүйлийн 17.2 дахь заалт, “Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, аашиглахыг хориглох тухай” хуулийн 4 дүгээр зүйлийн 4.1 дэх заалт, Соёлын өвийн тухай хуулийн 38 дугаар зүйлийн 38.1.1, 38.1.2 дахь заалтуудыг тус тус үндэслэн сумын Иргэдийн Төлөөлөгчдийн Хурлын ээлжит арван нэг дүгээр хуралдаанаас ТОГТООХ нь:
1.Сумын Засаг дарга Б.Төрбатын өргөн мэдээлэл дүгнэлт,“Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хуулийн 4 дүгээр зүйлийн 4.1 дэх заалт, Соёлын өвийн тухай хуулийн 38 дугаар зүйлийн 38.1.1, 38.1.2 дахь заалтуудыг үндэслэл болгон 36, 37, 39, 171,172 дугаартай 952.62 га газарт хайгуулын тусгай зөвшөөрөл сонгон шалгаруулалтаар олгох саналыг дэмжих боломжгүй гэж үзсүгэй.
2. Хуралдаанаас гарсан шийдвэр, бусад холбогдох бичиг баримтыг бүрдүүлж аймгийн Засаг даргад уламжилахыг сумын Засаг дарга /Б.Төрбат/-д үүрэг болгосугай.
3. Энэ тогтоолтой холбогдон гарах шийдвэрийг хууль, журамд нийцүүлэн ёсчилж, гаргахыг нарийн бичгийн дарга /Ж.Гандулам/, Газрын даамал /Б.Уянга/, Хууль эрх зүйн мэргэжилтэн /Б.Амарзаяа/ нарт, тогтоолын хэрэгжилтэнд хяналт тавьж ажиллахыг “Байгаль орчин, хөдөө аж ахуйн хороонд тус тус үүрэг болгосугай.
ДАРГА Г.ЧИНГИС